有一日同同事閒聊牛扒嘅煮法，要煮幾多成熟，如果太生就會有血水，咁我就突然想起電影「小親親」郭富城入面有一幕跟宣萱食牛扒，話塊牛扒太熟，後來換過一塊有血水五成熟嘅牛扒，佢就話「啱嗱！今次有月經嗱～」呢套已經係20年前嘅電影，當年票房一般，內容都很一般，已經係郭富城同陳慧琳第三套合作嘅電影，之前有「仙樂飄飄」同「安娜瑪德蓮娜」，而「安娜瑪德蓮娜」更是同樣係奚仲文執導，甚至兩套戲比我感覺都好似，又係冤家對咀式愛情鬧劇。
 |
| 故事由黑膠碟說起(電影截圖) |
近排無聊再睇返呢套戲，又勾起好多回憶，雖然電影劇情很普通，我仲覺得有啲搵戲黎做，但戲入面嘅原素令我印象深刻。故事嘅起源於一隻「愛的尿壺」嘅黑膠唱片，係陳慧琳送比張智霖嘅初戀禮物，但輾轉落入毛舜筠嘅古董店，又咁啱比身為黑膠碟節目DJ嘅郭富城所發現買左，只係帶唔夠錢而無即刻拎走，又咁啱比經過嘅陳慧琳見返呢隻「愛的尿壺」，於是想向郭富城回購不果所發生嘅一連串故事。
 |
| 當年嘅既中產又有文青味，而家已經好難搵(電影截圖) |
我好鍾意呢套電影濃厚嘅地道香港既中產又有文青味，以前UFO拍出黎嘅電影都有呢種味道，而家嘅電影已經無左呢種味道，都算係消失嘅特色；咁點解我都呢套戲咁印象深刻呢，因為係郭富城做嘅戲，哈哈~呢個係肯定，佢啲戲我大部份都睇左好多次，尤其是近幾年嘅(恐怖類別除外)，呢套戲D卡士都好強勁，但當然唔夠「安娜瑪德蓮娜」勁，有哥哥、袁詠儀同金城武等等~但呢套戲同哥哥都有關，因為當年導演奚仲文有請哥哥指導陳慧琳做戲比意見，而戲入面有一幕陳慧琳係飾演闊太嘅任葆琳(你無睇錯，係當年港姐出身，幾靚幾索，後來去左做南區區議員嘅任葆琳)屋企第一次相遇郭富城，而果間屋就係哥哥借出拍攝，睇返都覺得唏噓~
 |
| 哥哥借出屋企拍攝(電影截圖) |
睇呢套戲令我突然對黑膠碟提起左興趣，對JAZZ更加係一聽愛上，係當時年少無知嘅我，覺得呢啲都好新鮮，當年梗係無錢買黑膠碟聽(而家都無)，只有上網去搵JAZZ聽，戲入面就播左一首法國傳奇歌后「小雲雀」Édith Piaf 嘅<La Vie En Rose>，中文版就係陳百強嘅<粉紅的一生>(戲入面都有播，果次都係我第一次聽，一聽愛上)，係最近好紅嘅網劇<Emily in Paris>都有出現過，就因為一套戲我就搵到咁多資料出黎，簡直豐富左我嘅智識，仲有戲入面另一首由Rosemary Clooney唱嘅<I Wish You Love>，我又係超鍾意，其後我仲發現左Nat King Cole版，簡直係享受，靚聲到暈，就連戲入面嘅「Lady is a tramp」都有新版本，由Tony Bennett同Lady Gaga唱，如果當大家平時聽開流行曲或者重金屬音樂，間中聽下JAZZ就會有種耳目一新，好似洗一洗對耳仔嘅感覺，係有一種說不出嘅舒服感，當然我唔係咩專家，純粹覺得好聽就繼續聽，我都只係聽啲好大路嘅JAZZ，例如Tony Bennett、Frank Sinatra、Nat King Cole......大家有興趣都可以去聽下，當你聽流行曲聽到耳仔疲勞，聽JAZZ真係會令人耳目一新同情緒放鬆。
 |
| 套戲嘅卡士同「安娜瑪德蓮娜」有啲相同(電影截圖) |
另外，就係戲入面嘅專欄<月經>，令我覺得寫專欄係一件好「正」嘅事，因為可以將自己嘅睇法分享比其他人睇，令人產生共鳴感，就好似而家我打呢篇野咁，因為我心入面成日都有好多突如其來嘅想法，有時會想分享出黎，不過以前網絡無咁發達，仲未興咩KOL網紅，又無FACEBOOK、IG之類，只有XANGA，可以寫野發表意見嘅途徑無咁多又無咁多人睇，唯有係靠紙媒，但你寫左投稿人地又未必一定會登出黎，因為全世界咁多人投稿，最後就變左石沉大海，所以當年都無行出第一步，反而都係寫下XANGA算，哈哈~不過，而家實在太多途徑寫野比全世界嘅人睇，唔需要再靠紙媒，就好似而家我用Blog或者Facebook page嘅形式發表偉論一樣，人人都可以發揮創意做作家、KOL同網紅，呢套戲入面嘅專欄應該係出自編劇岸西嘅手筆，配上陳慧琳以獨白方式咁讀出黎，又幾有味道，好似仲搶鏡過佢戲入面嘅演技，哈哈~「我有一把白身膠柄嘅遮......」「人世間嘅破鏡重圓大概都係一言難盡.......」「淡淡嘅遺憾感會唔會更加啱洗啱用？」呢幾句真係記到而家。
 |
| 「我有一把白身膠柄嘅遮.....」(電影截圖) |
戲入面嘅每一首歌都好好聽，唔信大家都去睇返套戲(最底我放左2首嘅Youtube，有興趣可以聽下)，我當年睇完套戲對戲入面好多野都做過research，因為好奇心作祟，而家諗起又好似尋日嘅事咁，影響到我往後睇完啲戲都會做啲 research，咁又可以學多左野，又對套戲有更深了解，<小親親>呢套戲算唔上咩經典，當年男女主角啲演技都好一般，劇本亦唔係特別出色，但20年後再睇返，原來一切都已經變了樣，呢一刻令我覺得淡淡嘅遺憾感唔係幾啱用，反而更想追回那種味道與感覺，繼而一睇再睇，可惜嘅係景物依舊在，人面已全非。
